D'CID Fraen a Gender Bibliothéik läit verstoppt an der Stad. Bei enger klenger Dier drécks du op Schell a gees erop op den 2. Stack wou s du d'Bibliothéik fënns an der méi wéi 20.000 Bicher stinn zu den Theme Feminismus, Gender a Gläichberechtegung tëschent Fraen a Männer. De CID huet sech als Aufgab geholl, d'Wierker vun de Fraen déi en Afloss op eis Welt hannerlooss hunn, se sammelen. Looss dech dofir vun de Frae beandrocken di Geschicht geschriwwen hunn an de Beräicher Politik, Kultur, Naturwëssenschaften a nach villes méi, vun deenen een an eiser Gesellschaft oft ze wéineg héiert. Doriwwer eraus, gëtt et Bicher déi Gewalt u Fraen thematiséieren an d'mental a kierperlech Gesondheet uschwätzen. E groussen Deel un Belletristik ass och ze fannen an et kann en och Musek vu weiblech Artisten ausléinen aus der Mediathéik.