Den Intense spezialiséiert sech op vegane “specialty coffee”, den héichwäertegste Kaffi um Maart. Bei “specialty coffee” ass d’Transparenz an d’Qualitéit wichteg, soudass oft eng direkt Bezéiung tëschent Produzent a Konsument entsteet an eng besser Liewensgrondlag fir d’Bauere garantéiert ass. Vue dass si mat Hafermëllech schaffen hu si sech och eng adaptéiert Zort Kaffisboun erausgesicht. Op hierer minimalistescher Kaart sti juste d’Kaffiklassiker, e puer Téien a Jusen. Sie hunn och Snacks wéi vegan Sandwicher a Jugurt op er Kaart, woubäi opgepasst gëtt, dass d’Ingrediente regional sinn. D’Iessen gëtt ëmmer moies a klenge Quantitéite fir den Dag preparéiert a sollt e mol eppes iwwreg bleiwen, kritt een et den Dag drop méi bëlleg ze kafen. Soss gëtt et op en Food Sharing Point bruecht. Esou ka bal all Iessensverschwendung evitéiert ginn.